Ассотсиатсияи миллии занҳои соҳибкори Тоҷикистон бо дастгирии молиявии Агентии рушди байнулмилалии ИМА (USAID) дар Тоҷикистон ва ТҚХ «ИМОН Интернешнл» озмуни навбатии ҷумҳуриявии «Бонуи соҳибкори сол» Ҷоизаи «Фараҳ-2016»-ро эълон мекунад.
Ҳадафи аслии озмуни мазкур ҷалби таваҷчуҳи ҷомеа ба рушди соҳибкорӣ миёни занон ва мушкилоти бо шуғл фаро гирифтани онҳо, муайян кардани пешво ва роҳбарон миёни занҳои соҳибкор ва таблиғи таҷрибаи онҳо миёни ҷавонзанони кишвар мебошад.
Бо мукофот қадрдонӣ шудани соҳибкории занон ба баҳодиҳӣ ва эътирофи навгониҳо, саъйу кӯшиши занон ба такмил ва арзёбии нақши муҳими зан дар ҷомеа имкон медиҳад.
Озмун аз рӯи 6 номинатсия доир мегардад:
– Соҳаи истеҳсолот;
– Соҳаи хизматрасонӣ;
– Соҳаи зебогӣ, мӯд, дизайн ва ҳунармандӣ;
– Соҳаи кишоварзӣ;
– Соҳаи хизматрасониҳои тиббӣ ва маориф;
– Оғози тиҷорати нав – старт-ап.
Дар доираи озмун ҳавасманд сохтани тиҷорати занон аз ҷониби Комиссияи коршиносон дар назар аст, ки аз рӯи номинатсияҳо ғолибони озмунро муайян мекунанд. Барои инъикоси васеъ ва намоиши дастовардҳои занони соҳибкори тоҷик нашри маҷалла ва наворбардории филм дар нақша аст. «Фараҳ-2016» замина барои таҳкими шабакаи занони соҳибкор хоҳад шуд, ки ба роҳандозии робитаҳои корӣ, табодули таҷриба ва густариши фаъолияти соҳибкорӣ миёни занон мусоидат мекунад.
Ассотсиатсияи миллии занҳои соҳибкори Тоҷикистон аз занони соҳибкори Тоҷикистон даъват мекунад, ки дар ин озмун фаъолона ширкат варзанд. Ин имкони бузургест натанҳо барои табодули таҷриба дар роҳи комёбӣ, балки воситаест низ баҳри ба даст овардани донишу малакаҳои тоза, омӯзиши фаъолияти муваффақи занони соҳибкори кишварҳои хориҷӣ, баланд бардоштани сатҳи худбаҳодиҳӣ ва мусаллаҳ гардидан бо нерӯи нав баҳри пешрафт ва рушди тиҷорати худ.
Дастгирии ҳамдигарии занони муваффақ, илҳом бахшидан ба ҷавонзанони соҳибкор ва намунаи ибрати онҳо будан муҳим аст. Озмуни «Фараҳ-2016» аҳаммияти соҳибкории занон дар иқтисоди кишварро намоиш хоҳад дод, ки ба таври шоиста аз ҷониби ҷомеа баҳогузорӣ хоҳад шуд.
Муҳлати охирини пешниҳоди ҳуҷчатҳо – 1 июни соли 2016.
Маълумоти муфассал дар сомонаи
www.nabwt.tj
(гӯшаи Фараҳ).
