Масъулини Бонки миллии Тоҷикистон ба саволҳои муҳиму рӯзмарраи марбут ба вазъ дар бозори асъор посух доданд.
– Ба ҳолати 11 апрели соли 2011 қурби расмии сомонӣ нисбати доллар ба андозаи 7,3% коҳиш ёфт ва ин ҳам дар ҳолест, ки ҳамин давраи соли гузашта он ба 10,8% баробар буд. Қурби муомилоти фурӯши доллари нақд дар ин давра 13,3% афзуда, дар ҳамин давраи соли 2016 ин нишондиҳанда 5,7%-ро ташкил дода буд, – мегӯянд дар БМТ.
Аломати асосии фарқкунандаи вазъи имрӯза беҳад босуръат болоравии қурби муомилоти нақдӣ аст, ки ба пайдо шудан ва афзоиши фарқ миёни он ва дигар қурбҳои мубодилавӣ мусоидат кард. Чунин вазъ ба он оварда расонид, ки аҳолӣ ба таври оммавӣ ба ташкилотҳои қарзӣ муроҷиат намуда, фурӯши доллари нақдро талаб намуд ва ин дар навбати худ ба афзоиши талаботи ҳаннотон низ боис гардид.
– Барои ба эътидол овардани вазъ дар бозори нақдии асъор Бонки миллӣ чӣ тадбирҳо меандешад?
– Мо тадбирҳои зеринро рӯйи кор гирифтаем:
– афзоиши меъёри бозтамвил аз 11% то ба 16%;
– барои танзими ҳаҷми пул ҳамарӯза музоядаҳо оид ба фурӯши сертификатҳои Бонки миллӣ гузаронида мешаванд;
– таъсиси гурӯҳҳои корӣ оид ба назорати фаъолияти ташкилотҳои қарзии анҷомдиҳандаи амалиёти мубодилавӣ ва интиқолӣ дар саросари ҷумҳурӣ, аз ҷумла таъсиси гурӯҳҳои кории муштарак бо Прокуратураи генералӣ ва мақомоти маҳаллии он;
Шахсонеро, ки мунтазам доллар харидорӣ мекунанд, чӣ гуна ҷазо интизор аст? Баҳри эътидоли вазъ дар бозор Бонки миллӣ боз чӣ гуна чораҳо меандешад ва дар ниҳояти кор чӣ омиле сабаби аслии буҳрон аст – дастгирии бонкҳои дучори мушкилот, ҳаннотӣ дар бозор ё чизи дигаре? Посух ба ин ва дигар мушкилоти бозори асъор дар мусоҳибае, ки матни пуррааш пагоҳ, 13 апрел дар шумораи навбатии газетаи «Азия-Плюс» ба нашр мерасад.
