Дар рафти суҳбати телефонии президенти Тоҷикистон Эмомалӣ Раҳмон ва президенти Туркия Реҷеп Тайип Эрдоган, ки рӯзи 1 август баргузор гардид, сарони давлатҳо ба муносибати Иди мубораки Қурбон мубодилаи табрикоти самимиро унвонии мардумони ба ҳам бародари ду кишвар анҷом доданд.
Бино ба иттилои хадамоти матбуоти сарвари давлат, ҷонибҳо ҳамчунин атрофи раванди нигаронкунандаи паҳншавии пандемияи “Ковид-19” дар сатҳи ҷаҳонӣ табодули назар карданд.
“Дар ин зимн Эмомалӣ Раҳмон ба мардуми шарифи Туркия, наздикону пайвандони қурбониёни ин бемории ҳамагир ҳамдардии амиқ баён намуда, ба бемороне, ки гирифтори он мебошанд, шифои ҳарчи зудтар орзу кард”, – омадааст дар хабар.
Гуфта мешавад, ба ҷониби Туркия барои тақдими кумаки башардӯстонаи тиббӣ ва мусоидат дар баргардонидани шаҳрвандони Тоҷикистон ба ватан миннатдории ин ҷониб иброз карда шуд.
“Дар робита ба ин сарони кишварҳо омодагии ҷонибҳоро ҷиҳати дар ояндаи наздик аз нав ба роҳ мондани парвозҳои мунтазамро байни ду кишвар таъкид карданд”, – қайд мешавад дар хабари хадамоти матбуоти сарвари давлат.
Зимни суҳбат ҷонибҳо ба масъалаҳои алоҳидаи муносибатҳои Тоҷикистону Туркия, аз ҷумла рушди ҳамкориҳои тиҷоративу иқтисодӣ, инчунин ҳамкорӣ дар соҳаи амниятӣ ва муборизаи муштарак алайҳи хатару таҳдидҳои глобалӣ таваҷҷуҳ зоҳир карда, инчунин дигар масъалаҳои мубрами байналмилалӣ ва минтақавӣ баррасӣ шуданд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
