Сохторҳои дахлдори Тоҷикистон ба гуфтушунидҳо оид ба ҷалби маблағҳои грантии ниҳодҳои молиявии байнулмилалӣ идома медиҳанд.
Бино ба иттилои Вазорати рушди иқтисод ва савдо, дар ин хусус аз ҷумла бо Бонки осиёии рушд, Бонки Ҷаҳонӣ, Фонди авруосиёии рушд, Бонки осиёии сармоягузории инфрасохторӣ гуфтушунидҳо ҷараён доранд.
Гуфта мешавад, кумаки бебозгашти молиявӣ бо мақсади иҷрои дастурҳои президент барои пешгирӣ ва коҳиши таъсири пандемияи коронавирус ба иқтисоди кишвар ҷалб мешавад.
Таъкид мешавад, ки бо ин мақсад то ҳол қарзи бефоиз аз Хазинаи байнулмилалии асъор ($189,5 млн), маблағҳои грантии Бонки осиёии рушд ($9,4 млн), Бонки ҷаҳонӣ ($11,3 млн) ва Бонки исломии рушд ($9,4 млн), инчунин ҳукумати Олмон (1 млн. евро) ҷалб шудааст.
Қаблан хабар дода будем, ки ҳукумати Тоҷикистон баҳри дастгирии иқтисоди кишвар ба дастрас кардани кумаки бебозгашти ниҳодҳои молиявӣ ба маблағи ҳудуди 70 млн доллар умедвор аст.
“Дар оянда ҷалби маблағҳои грантӣ аз Бонки осиёии рушд дар ҳаҷми 52,5 млн доллар ва аз Бонки ҷаҳонӣ дар ҳаҷми 16 млн. доллар дар назар аст, ки барои рушди иқтисодиёти кишвар ва низоми бонкӣ муҳим мебошад, – иброз дошт муовини якуми раиси Бонки миллии Тоҷикистон (БМТ) Ҷамолиддин Нуралиев зимни ҷаласаи васеи роҳбарияти БМТ бо роҳбарони ташкилотҳои қарзӣ.
Ӯ қайд кард, ки бо ин мақсад дар нимсолаи аввали соли 2020 дар маҷмӯъ ба маблағи 300,8 млн. доллар маблағгузориҳо аз ташкилотҳои байналмилалии молиявӣ ҷалб карда шуд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
