Муовини раиси Кумитаи кор бо ҷавонон ва варзиши ҷумҳурӣ Дилшод Назаров изҳор дошт, ки соли 2022 барои варзиши тоҷик яке аз солҳои калидӣ аз лиҳози омодагии варзишгарон ба Бозиҳои олимпии соли 2024 дар Париж маҳсуб меёбад.
“Гап сари он аст, ки давраи дарпешистода бар асари пандемияи коронавирус дар саросари ҷаҳон аз маъмулӣ кӯтоҳтар шуд. То Олимпиадаи Париж ҳамагӣ дувуним сол боқӣ монда, ворид намудани тағйирот дар нақшаҳои моро талаб мекунад”, – иброз дошт Назаров ба “Азия-Плюс”.
Моҳи декабри соли 2021 Дилшод Назаров яке аз муовинони президенти Кумитаи миллии олимпии Тоҷикистон интихоб шуд.
Чун Кумита ташкилоти ҷамъиятист, варзишгари маъруф дар вазифаи худ дар Кумитаи варзиш боқӣ мемонад.
“Аз ин рӯ, хабарҳои бархе аз ВАО дар бораи гӯё аз Кумитаи кор бо ҷавонон ва варзиш рафтани ман ягон асоси воқеӣ надоранд, – гуфт Дилшод Назаров. – Дар Кумитаи варзиш мондану намондани манро президент ҳал мекунад. Ин салоҳияти ӯст. Ба куҷое, ки ӯ мефиристад, ҳамон ҷо ба халқам хидмат мекунам. Ҳозир ва умуман имсол ман хеле серкорам. Барои варзишгарони ватанӣ имсол Бозиҳои Осиё дар Ханчжоу муҳиманд, ки тирамоҳ баргузор мешаванд. Ин бозиҳо ба мо ҳарчи бештар ҷиҳтаи омодагӣ ба Олимпиадаи соли 2024 кумак мекунанд”.
Дилшод Назаров ҳамчунин дар бораи натиҷаҳои соли 2021 дар бахши варзиши Тоҷикистон изҳори назар кард.
“Бо вуҷуди дар Олимпиадаи Токио соҳиби медал нашуданамон, солро метавон муваффақ арзёбӣ намуд, – зикр кард вай. – Натиҷаҳои ҷудокорон дар як қатор мусобиқаҳои байнулмилалӣ, пирӯзии Акмалиддин Каримов дар чемпионати ҷаҳонии самбо, баргузории як қатор мусобиқаҳои байнулмилалӣ дар Тоҷикистон оид ба футбол, теннис ва варзиши сабук умедворкунандаву хурсандиовар аст. Метавон бисёре аз варзишгарони ҷавонро номбар кард, ки Тоҷикистонро метавонанд дар Бозиҳои олимпии Париж баъди ду сол ба таври шоиста намояндагӣ кунанд”.
Ба гуфтаи Дилшод Назаров, айни замон бар асоси созишномаи сеҷониба байни Кумитаи варзиш, Кумитаи миллии олимпӣ ва федератсияҳои дахлдори навъи варзиш дар мавриди омодагии варзишгарон дар доираи давраи нави олимпӣ, ки дар натиҷаи аз соли 2020 ба соли 2021 гузаронидани Олимпиада кӯтоҳ шуд, корҳо бурда мешаванд.
Дар Telegram, Facebook, Instagram, OK ва ВК бо мо бимонед.
Лутфан, хабари муҳим, суол ва аксу видеоҳои ҷолибро ба Asia-Plus тавассути Viber, Telegram, Whatsapp, Imo ба рақами +992 93 792 42 45 фиристед.
