Бино ба иттилои манбаъҳои "Азия-Плюс" дар Дастгоҳи иҷроияи президенти Тоҷикистон дар пайи тағйироти кадрии имрӯз, ҳамчунин раиси шаҳри Ваҳдат ва раисони шаҳри Бӯстону ноҳияи Ашти вилояти Суғд ҳам барканор шудаанд.
Ба гуфтаи манбаъ, Раҳмоналӣ Амирзода, раиси шаҳри Ваҳдат ҳам барканор шудааст, аммо манбаъ нагуфт, ки Амирзода ба мансаби дигар таъин шудааст ё не. Амирзода дар гузашта раиси шаҳри Исфараи вилояти Суғд буд.
Амирзода аз раисони хабарсози солҳои ахир буд, ки борҳо дар расонаҳо ва шабакаҳои иҷтимоӣ номи ӯ дар пайванд ба иқдомҳои гуногун расонаӣ шуда буд.
Ҳамчунин ин манбаъ гуфт, ки Зариф Мирдадо раиси ноҳияи Ашти вилояти Суғд аз мақом барканор ва муовини раиси вилояти Суғд дар умури кишоварзӣ таъин шудааст. Ин мақомро то чанде пеш Зариф Нозирӣ ба дӯш доштанд, ки моҳи ноябр раиси ноҳияи Фархори вилояти Хатлон таъин шуд.
Нозирӣ бародарзодаи сарвазири Тоҷикистон Қоҳир Расулзода мебошад, ки дар гузаштаи раиси ноҳияи Бобоҷон Ғафуров ҳам буд.
Шуҳрат Мамадҷонов ба ҷойи Мирдадо, раиси нави ноҳияи Ашт таъин шудааст. Мамадҷоновро яке аз тоҷирони маъруфи мева дар ин ноҳия ном мербаранд, ки садҳо ҳектор боғ дорад.
Ин манбаъ, ҳамчунин аз барканории раиси шаҳри Бӯстон Раъно Ҳошимзода хабар дод ва гуфт, ӯ шаҳрдори Гулистони вилояти Суғд таъин шуд.
Тағйироти кадрӣ, бар пайи ҷаласаи ҷамъбастии ҳукумат, ки рӯзи 20-уми январ сурат гирифта буд, роҳандозӣ шудааст.
Аз ин пештар, хабари барканории вазири кишоварзии Тоҷикистон Сулаймон Зиёзода ва муовини сарвазири Тоҷикистон дар умури кишоварзӣ таъин шудани ӯро манобеи ба мо таъйид карданд.
Ба гуфтаи манобеи "Азия-Плюс" дар Вазорати кишоварзӣ, ба ҷойи Зиёзода, муовини аввалаш Саъдӣ Каримзода вазири кишоварзии Тоҷикистон таъин шудааст.
Дар Telegram, Facebook, Instagram, OK ва ВК бо мо бимонед.
Лутфан, хабари муҳим, суол ва аксу видеоҳои ҷолибро ба Asia-Plus тавассути Viber, Telegram, Whatsapp, Imo ба рақами +992 93 792 42 45 фиристед.
