Таҳти раёсати Президенти Ҷумҳурии Тоҷикистон, Раиси Ҳукумати мамлакат Эмомалӣ Раҳмон рӯзи 30 август маҷлиси ҳукумат баргузор шуд.
Тавре ки хадамоти матбуоти сарвари давлат хабар медиҳад, дар маҷлис нахуст ҳисоботи вазири меҳнат, муҳоҷират ва шуғли аҳолии ҷумҳурӣ Ширин Амонзода оид ба ҷараёни иҷрои қарори ҳукумати ҶТ “Дар бораи Барномаи давлатии мусоидат ба шуғли аҳолии ҶТ барои солҳои 2020-2022” шунида шуд.
Гуфта мешавад, Барномаи мазкур фарогири маҷмуи тадбирҳоест, ки барои мусоидат ба шуғли аҳолӣ шароит фароҳам оварда, ба ин васила ҷиҳати баланд бардоштани сатҳи некуаҳволии аҳолии кишвар замина мегузорад.
Бино ба маълумоти вазир, иҷрои дурнамои маҷмуии нишондиҳандаҳои Барнома барои солҳои 2020-2021 ва нимсолаи аввали соли 2022 дар сатҳи 99,8 фоиз таъмин карда шудааст.
Давоми солҳои 2020-2021 ва нимсолаи якуми соли 2022 ба мақомоти меҳнат ва шуғли аҳолӣ 353 ҳазору 402 нафар шаҳрванд муроҷиат намуданд. Дар доираи татбиқи Барномаи давлатии мусоидат ба шуғли аҳолӣ, дар маҷмуъ 179 ҳазору 240 нафар бо ҷойҳои корӣ таъмин гардид. Ба 32 ҳазору 358 шаҳрванд ба муддати 3 моҳ кумакпулӣ барои бекорӣ пардохт карда шуд.
Мувофиқи маълумоти Агентии омори назди Президенти ҶТ дар солҳои 2020-2021 ва семоҳаи якуми соли 2022 дар Тоҷикистон дар соҳаҳои иқтисодиёт 421 ҳазору 726 ҷои нави корӣ таъсис дода шуд, ки аз ин 156 ҳазору 623 ҷойи кори доимӣ мебошад.
Дар маҷлиси ҳукумат инчунин лоиҳаҳои як қатор қонунҳо, аз ҷумла оид ба ворид намудани тағйиру илова ба Кодекси ҳуқуқвайронкунии маъмурии ҶТ, Кодекси ҷиноятӣ, Кодекси мурофиавии ҷиноятӣ, қонунҳо “Дар бораи мақомоти прокуратураи ҶТ”, “Дар бораи рӯзҳои ид”, “Дар бораи масъулияти падару модар дар таълиму тарбияи фарзанд”, “Дар бораи ҳифзи ҳуқуқҳои кӯдак” ва “Дар бораи фаъолияти эҳсонкорӣ” муҳокима гардида, барои баррасӣ ба Маҷлиси намояндагони Маҷлиси Олии ҶТ ирсол гардид.
Ҳамчунин масъалаҳо Дар хусуси Конвенсияи қолабӣ оид ба одоби сайёҳӣ, Дар бораи Консепсияи гузариш ба таҳсилоти рақамӣ дар ҶТ барои давраи то соли 2042 ва Дар бораи минтақаи сайёҳии “Роғун” мавриди баррасӣ қарор дода шуд.
