Дар вилояти Хатлон ва Ноҳияҳои тобеи ҷумҳурӣ шиддатёбии вазиши шамол аз самти ҷанубу-ғарб дар ноҳияҳои алоҳида то 15-20м/с дар назар буда, тӯфони чангу ғубор ба амал меояд, хабар медиҳад Агентии обуҳавошиносии Тоҷикистон.
“Рӯзҳои 24-25 июн дар ноҳияҳои ҷанубӣ ва марказии вилояти Хатлон, минтақаи Кӯлоб, Ноҳияҳои тобеи марказ, шаҳри Душанбе бо сабаби омилҳои метеорологӣ (чангбоде, ки аз самти ҷанубу-ғарбӣ, ба кишвар ворид мегардид), баланд шудани ҳолати ифлосшавии ҳавои атмосфера аз моддаҳои муаллақ (чанг), зарачаҳои андозаашон 10мкр (Рм-10) ва зарачаҳои андозаашон 2,5мкр (Рм-2,5) пешбинӣ мешавад”, – омадааст дар хабари обуҳавошиносон.
Ҳамчунин гуфта мешавад, рӯзҳои 23-24 июн дар ноҳияҳои алоҳидаи ғарби ВМКБ ба амал омадани зуҳуроти сели пиряхӣ пешгӯӣ шуда, дар ноҳияҳои алоҳидаи кӯҳии Ноҳияҳои тобеи марказ ба амал омадани зуҳуроти сели хусусияти маҳаллӣ дошта аз эҳтимол дур нест.
Ёдрас мекунем, ки тибқи маълумоти таҳқиқоти гурӯҳҳои коршиносон дар кишварҳои Осиёи Марказӣ, қаъри хушкшудаии баҳри Арал, биёбонҳои Қароқум ва Қизилқум манбаи асосии тундбоди регу чангу хоканд, ки ба экологияи Точикистон тахдид мекунанд.
Тӯфони чангу ғубор ба Тоҷикистон аз Афғонистон ҳам меояд. Боз манбаъҳои маҳаллии тӯфонҳои қум ва чанг вуҷуд доранд. Онҳо дар ҷанубу ғарби мамлакат дар мавзеъҳои резишгоҳи дарьёҳои Вахш ва Кофарниҳон, инчунин ба резишгоҳи миёнаи дарьёи Сир, ки аз он ҷо ба “Баҳри тоҷик” ҷорӣ мешавад, алоқаманданд.
