Собиқадор аз он изҳори таҷҷуб мекунад, ки чӣ гуна гурӯҳи иборат аз 20 нафар ҷангиёни “Давлати исломӣ” ноаён сарҳади давлатии Афғонистон бо Тоҷикистонро гузашта, ба даруни қаламрави кишвар ворид шудааст.
Собиқадори мақомоти амнияти давлатии Тоҷикистон Давлатхоҷа Назиров бовар надорад, ки рӯзи 6-уми ноябр маҳз ҷангиёни “Давлати исломӣ” (гурӯҳи террористии фаъолияташ дар Тоҷикистон мамнӯъ) ба дидбонгоҳи сарҳадии “Ишқобод” дар наздикии сарҳади Тоҷикистону Ӯзбекистон ҳамла кардаанд.
“Шубҳаовар аст, ки гурӯҳи ҷангиёни “Давлати исломӣ” иборат аз 20 нафар пинҳонӣ тариқи сарҳади давлатии Афғонистон бо Тоҷикистон гузашта бошанд ва ғайриимкон аст, ки онҳо дар муддати се рӯз ноаён қариб 200 километр масофаро аз Қубодиён то ноҳияи Рӯдакӣ тай кардаанд ва ба пойтахт наздик шудаанд”, – гуфт ба “Азия-Плюс” собиқадори мақомоти амнияти давлатӣ.
Ӯ ҳамчунин далели дар фурсати кӯтоҳ нобуд кардани аъзои гурӯҳи ҷиноятпешаро зери шубҳа гузошт.
“Ҳамлаи ҷангиён ногаҳонӣ буд ва онҳо аз ин истифода накарда наметавонистанд. Ба ҷуз ин, маълум аст, ки ҷангиёни “Давлати исломӣ” наметавонанд ба ин тарз ноуҳдабароёна ҳуҷумеро ташкил кунанд, ки сохторҳои қудратии Тоҷикистон дар фурсати кӯтоҳ онро саркӯб созанд”, – мегӯяд коршинос.
Ин полковники мустаъфии Кумитаи давлатии амнияти Иттиҳоди Шӯравӣ ба “Азия-Плюс” гуфт, ки эҳтимол гурӯҳи безараршуда аз шаҳрвандони рӯҳияи террористӣ ва ифротидоштаи Тоҷикистон иборат буд.
“Шояд онҳо ба дидбонгоҳи сарҳадӣ дар роҳ аз Тоҷикистон ба Афғонистон ҳуҷум кардаанд. Ба ин ҳаракат кардани онҳо дар автомашинаҳои дорои рақамҳои давлатии Душанбе шаҳодат медиҳад”, – афзуд коршинос.
Ӯ мутмаин аст, “ба дидбонгоҳи сарҳадӣ ифротгароёни корноозмудае ҳамла кардаанд, ки нияти пайвастан ба созмонҳои террористӣ дар Афғонистонро доштанд”.
Шаби 6-уми ноябр гурӯҳи мусаллаҳи иборат аз 20 нафар бо истифода аз силоҳи оташфишон ба дидбонгоҳи сарҳадии №4-и «Ишқобод»-и қисми ҳарбии отряди сарҳадии «Султонобод» дар наздикии марзи Тоҷикистону Ӯзбекистон ҳуҷум карданд.
Тибқи маълумоти маркази матбуоти Қӯшунҳои сарҳадии КДАМ ҶТ, ин ҳамла аз ҷониби ҷангиёни “Давлати исломӣ”, ки аз Афғонистон омадаанд, сурат пазируфт.
Дар ин задухӯрди мусаллаҳона 1 сарбози Қӯшунҳои сарҳадӣ ва 1 корманди Вазорати корҳои дохилии ҶТ фавтида, 15 тан аз ҷангиён безарар гардонида шуданд. КДАМ аз боздошти 5 нафари зиндамонда ва бозпурсии онҳо хабар дод.
Аммо дар торнамои Вазорати корҳои дохилии ҶТ шумори дастгиршудагон 4 нафар навишта шудааст. Ҳамчунин дар торнамои ВКД рӯзи 6-уми ноябр аксҳо аз натиҷаҳои амалиёти махсус нашр гардида, баъдан ҳазф карда шуданд.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
