Рӯзи 10-уми декабри соли равон ба таъсисёбии Ҳизби Халқии Демократии Тоҷикистон 19 сол пур мешавад.
Бино ба иттилои сомонаи расмии ҲХДТ, бо мақсади дар сатҳи баланд ва хотирмон ҷашн гирифтани ин сана бо ҷалби аъзо, ҷонибдорон ва ташкилотҳои ибтидоӣ тибқи дастури Кумитаи Иҷроияи Марказии ҲХДТ дар кумитаҳои иҷроияи ҳизбии вилоятҳо, шаҳру ноҳияҳои ҷумҳурӣ як зумра чорабиниҳои оммавӣ, варзишӣ ва илмиву фарҳангӣ доир мегардад.
Ба иттилои манбаъ, инчунин оид ба таърихи таъсисёбии ҳизб ва дастоварду муваффақиятҳои он дар давоми мавҷудият маводҳо нашр мешаванд, ки дастраси аъзоён мегарданд.
Зимнан зикр мегардад, ки ҳамзамон, барои дар сатҳи назаррас қайд намудани 20-солагии ҲХДТ, ки 10-уми декабри соли 2014 баргузории он дар назар аст, кумитаҳои тадорукот таъсис намуда, нақшаи чорабиниҳои мушаххас оид ба баргузории ин сана таҳия ва амалӣ менамоянд.
Ҳизби халқии демократии Тоҷикистон соли 1994 таъсис ёфта, айни замон шумори аъзои он беш аз 235 ҳазор нафарро ташкил медиҳад. Ҳудуди 40 дарсади аъзои ҳизб ҷавонон мебошанд. Раиси ҳизб президенти Тоҷикистон Эмомалӣ Раҳмон аст. Аксари аъзои ҳукумат, вакилони палатаи поёнии парлумон ва маҷлисҳои маҳаллии вакилони халқи вилоят ва шаҳру навоҳии ҷумҳурӣ аъзои ҳамин ҳизбанд.
