Президенти Тоҷикистон Эмомалӣ Раҳмсон Бинобар суқути ҳавопаймои ширктаи ҳавопаймоии Малайзия дар ҳарими ҳавоии Украина ба сарвазири ин кишвар Дато Сри Моҳд Наҷиб Тун Абдулраззоқ барқияи тасаллият ирсол намуд.
Бино ба иттилои хадамоти матбуоти сарвари давлат, дар барқияи тасаллияти Эмомалӣ Раҳмон зикр мегардад, ки «мардуми Тоҷикистон бо андӯҳи бузург хабари фоҷиабори суқути ҳавопаймои мусофирбари Боинг-777-и ширкати ҳавопаймоии Малайзияро дар қаламрави Украина, ки муҷиби шаҳодати теъдоди зиёди мардуми бегуноҳ гаштааст, дарёфт намуд».
«Бо изҳори таъзия ва тасаллият ба тамоми мардуми дӯст ва бародари Малайзия аз Ҷаноби Олӣ хоҳишмандам, ки эҳсоси амиқи ҳамдардии моро ба наздикони шуҳадо бирасонанд» – омадааст дар барқия.
Ҳамчунин дар робита ба ин ҳодисаи фоҷеабор президенти Тоҷикистон Эмомалӣ Раҳмон ба Шоҳи Нидерланд Виллем-Александр Клаус Георг Фердинанд низ барқияи тасаллият фиристод, ки дар он аз ҳалокати теъдоди зиёди шаҳрвандони Нидерланд дар ин садама изҳори ҳамдардӣ карда мешавад.
Ёдрас мекунем, ки шоми дирӯз дар ҳарими ҳавоии Украина ҳавопаймои Боинг – 777-и ширкати ҳавопаймоии Малайзия, ки тариқи хатсайри Амстердам – Куала-Лумпур парвоз мекард, мавриди суқут қарор гирифта, дар натиҷа ҳамаи мусофирону ҳайати идоракунундаи ҳавопаймо – 298 нафар ба ҳалокат расиданд.
