Ахири ҳафтаи гузашта дар шаҳри Ашхобод аз ҷониби Маркази минтақавии СММ оид ба дипломатияи боздоранда барои Осиёи Марказӣ (ММДБОМ) ва бо дастгирии Вазорати корҳои хориҷии Ҷумҳурии Туркманистон 5-умин вохӯрии Муовинони вазирони корҳои хориҷии кишварҳои Осиёи Марказӣ баргузор гардид. Ҷумҳурии Тоҷикистонро дар ин вохӯрӣ Муовини вазири корҳои хориҷӣ Низомиддин Зоҳидӣ намояндагӣ кард.
Бино ба маълумоти департаменти иттилооти Вазорати корҳои хориҷии ҶТ, ба сифати меҳмонони махсус дар вохӯрӣ Намояндаи вежаи Дабири кулли СММ дар Афғонистон Николас Хейсом, Ёвари Дабири кулли СММ оид ба масъалаҳои сиёсӣ Енс Тойберг-Франзен, инчунин Роҳбари минтақавии Бонки умумиҷаҳонӣ барои Осиёи Марказӣ Сародж Кумар Ча ҳузур доштанд.
Ширкаткунандагони вохӯрӣ оид ба роҳҳои таҳкими амният дар Осиёи Марказӣ, инчунин дурнамои рушди вазъият дар минтақа дар пасманзари хуруҷи Нерӯҳои эътилофи байналмилалӣ аз Афғонистон мубодилаи афкор намуданд.
Дар ин росто, ширкаткунандагони чорабинӣ натиҷаҳои фаъолияти ММДБОМ-ро дар соли гузашта мавриди баррасӣ қарор дода, нақшаҳои Марказро барои солҳои 2015-2017 баррасӣ намуданд. Муовинони вазирони корҳои хориҷии кишварҳои минтақа инчунин мулоҳизаҳои хешро оид ба Барномаи нави амали ММДБОМ барои се соли оянда иброз намуданд.
Дар чаҳорчӯби вохӯрии мазкур Муовини вазири корҳои хориҷии Ҷумҳурии Тоҷикистон Н. Зоҳидӣ бо Намояндаи махсуси Дабири кулли СММ дар Афғонистон Николас Хейсом ва Роҳбари Маркази минтақавии СММ оид ба дипломатияи боздоранда барои Осиёи Марказӣ Мирослав Енча мулоқотҳои дуҷониба баргузор намуд, ки зимни онҳо масъалаҳои ҳамкорӣ дар самти мубориза бо чолишҳои мавҷуда ва хатарҳои имконпазир ба амният ва суботи минтақа мавриди табодули назар қарор гирифтанд.
