Ҳукуматдорони Қирғизистон созишномаи ҳамкорӣ бо Иёлоти Муттаҳидаи Амрико аз соли 1993-ро расман бекор намуданд.
Хабаргузории
РБК
дар ин робита менависад, нахуствазири Қирғизистон Темур Сариев қарор дар бораи бекор кардани созишнома бо ИМА аз соли 1993-ро тасдиқ кардааст. Дар ин бора дар
сомонаи
ҳукумати Қирғизистон низ иттилоъ дода мешавад.
Гуфта мешавад, ин санад аз 20 августи соли 2015 мавриди амал қарор мегирад. Ҳафтаи гузашта Вазорати корҳои хориҷии Қирғизистон дар робита ба аз ҷониби департаменти давлатии ИМА бо ҷоизаи «Муҳофизи ҳуқуқи инсон» қадрдонӣ шудани ҳомии ҳуқуқ Азимҷон Аскаров дар бораи лағви созишнома бо ИМА огаҳӣ дода буд. Аскаровро соли 2011 суди Қирғизистон ба иттиҳоми барангехтани низоъи миллӣ миёни қирғизҳову ӯзбекҳо, ки дар ҷараёни он 893 нафар ҳалок шуданд, ба ҳабси абад маҳкум карда буд.
Дар ҳамин ҳол, намояндаи департаменти давлатии ИМА ба хабаргузории
ТАСС
дар ин робита гуфтааст, ИМА оқибатҳои техникии қарори якҷониба бекор шудани созишнома бо Қирғизистон аз соли 1993-ро мавриди омӯзиш қарор додааст.
