Имсол моҳи шарифи Рамазон дар Тоҷикистон рӯзи 6 май оғоз мегардад, хабар доданд ба “Азия-Плюс” аз котиботи Шӯрои уламои Маркази исломии ҷумҳурӣ.
Бино ба гуфтаи манбаъ, ин сана имрӯз дар ҷаласаи аъзои Шӯрои уламои Тоҷикистон тасдиқ шудааст.
“Аввалин намози таровеҳ, ки танҳо дар моҳи Рамазон хонда мешавад, шоми рӯзи 5 май баргузор мешавад”, – қайд карда манбаъ.
Шаби Лайлат-ул Қадри моҳи Рамазони имсола ба шаби 31 май – 1 июн рост меояд. Иди Рамазон санаи 5 уми июн ҷашн гирифта мешавад.
Ҳамасола моҳи шарифи Рамазон 10 рӯз пештар аз соли гузашта фаро мерасад. Соли гузашта ин моҳ санаи 16 май оғоз гардида буд.
Моҳи шарифи Рамазон аз моҳҳои солшумории ҳиҷрии қамарӣ шуморида мешавад. Мусулмонон дар ин моҳ рӯза гирифта, бештар ба ибодат ва қироати Қуръон машғул мешаванд. Моҳи Рамазон бо Ид алфитр ё Иди Рамазон ба анҷом мерасад, ки иди бузургу муҳими мусалмонон ба шумор меравад.
Рӯзаи моҳи шарифи Рамазон ҳукми Худованд буда, мисли намозу закот яке аз рукнҳои муҳими ислом мебошад. Рӯза иборат аз худдорӣ намудан аз хӯрдан, ошомидан ва ҳамхобагӣ кардан аз субҳи содиқ то ғуруби офтоб аст. Рӯзаи моҳи шарифи Рамазон аҷру савоби бузург ва подоши бешумор дорад. Паёмбари гиромӣ рӯзаи моҳи Рамазонро сипар ва нигаҳдорандаи соҳиби худ аз оташ номида, фармудааст, ки «рӯза доштан танҳо нахӯрдану наошомидан нест, балки парҳез аз суханҳои ношоиста ва корҳои зишт низ мебошад».
Рӯзадорӣ дар ин моҳи шариф яке аз панҷ рукнҳои ислом аст. Парҳезгорӣ қариб дар ҳамаи динҳо дунё вуҷуд дорад. Ҳадафи ин навъи ибодат дар дини ислом ҳарчи бештар наздикшавӣ ба Худо маънидод мешавад.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед
