Коршиносони Созмони ҷаҳонии тандурустӣ (СҶТ) рӯзи 22-юми январ дар Женева тасмим гирифтанд, ки алҳол аз сабаби хуруҷи коронавируси нав ҳолати фавқулодда (ҲФ) эълон намекунанд.
Бино ба маълумот дар сомонаи созмон, дар ҷаласаи кумитаи ҳолатҳои фавқулода директори генералии СҶТ Тедрос Адханом Гебрейесус иброз доштааст, ки барои қабули қарори ниҳоӣ ба онҳо маълумоти бештар лозим аст. Аз ин рӯ, коршиносони кумитаи ҳолатҳои фавқулоддаи созмон қарор кардаанд, ки имрӯз, 23-юми январ боз як ҷаласаи дигар мегузаронанд.
“Ин вазъ ҷараён дошта, хеле мураккаб аст… Имрӯз мо онро баррасӣ карда, фаҳмидем, ки ҷиҳати қабули қарор маълумоти бештар лозим аст. Бо ин сабаб ман аз кумитаи ҳолатҳои фавқулодда дархост кардам, ки пагоҳ (23-юми январ) баррасии масъаларо идома диҳанд”, – гуфтааст роҳбари СҶТ.
Дар ҳамин ҳол, СҶТ ҳушдор додааст, ки ба наздикӣ дар Чин ва дигар кишварҳо паҳншавии бемории илтиҳоби шуши навро интизор мебояд шуд, ки аз коронавируси 2019-nCoV ба вуҷуд меояд.
Ин ҷо бароятон кортҳоро омода кардем, ки ба ҳама гуна суолҳои муҳими вобаста ба коронавирус посух дарёфт карда метавонед.
Дар посух ба суоли хабаргузории Reuters оид ба сабаби ҳолатҳои нави сироятёбӣ, намояндаи СҶТ Тарик Язаревич гуфтааст, ки агар Чин пайгирии онро пурзӯртар кунад, ҳолатҳои нав пайдо хоҳанд шуд.
“Агар шумо ба пайгирӣ (мониторинг) ва ташхису муоина (диагностика) тақвият диҳед, рақамҳои нав мегиред”, – афзудааст ӯ.
То ҳозир вирус асосан дар шаҳри Ухани Чин мутамарказ шуда буд. Чунин шуморида мешавад, ки он дар бозори маҳсулоти баҳрии шаҳр пайдо гардидааст, ҳарчанд дар Шанхай ва Пекин низ ҳолатҳои ҷудогона ба қайд гирифта шудааст.
Бар асари сирояти он то имрӯз 17 нафар дар Чин ҳалок шуданд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
