Дар Душанбе рӯзҳои 28-29 сентябр баргузории ҷаласаи навбатии Комиссияи муштараки байниҳукуматии Тоҷикистону Ӯзбекистон оид ба масоили ҳамкориҳои тиҷоративу иқтисодӣ ва иҷтимоиву фарҳангӣ дар назар аст. Дар ин бора ба “Азия-Плюс” як манбаъ аз ҳукумати Тоҷикистон хабар дод.
Ҳамраисони Комиссияи байниҳукуматӣ сарвазири Тоҷикистон Қоҳир Расулзода ва ҳамтои ӯзбеки ӯ Абдулло Орипов мебошанд.
Ҷонибҳо масъалаҳои боз намудани сарҳад ва барқарор кардани алоқаи ҳавоӣ байни давлатҳоро, ки бар асари пандемияи сирояти коронавирус нимаи моҳи март баста шуда буд, мувофиқа мекунанд.
Дар ҷаласа ҷонибҳо ният доранд, ки масоили марбут ба густариши савдои дуҷониба, лоиҳаҳои сармоягузории муштарак, тавсеъаи робитаҳо дар бахшҳои нақлиёту коммуникатсия, муносибатҳо байни минтақаҳоро баррасӣ намоянд.
Ба иттилои манбаъ, дар ҷаласа масъалаи ҳаҷми интиқоли барқ аз Тоҷикистон ба Ӯзбекистон, гази табиӣ аз Ӯзбекистон ба Тоҷикистон ва нархи онҳо дар соли оянда низ мувофиқа мешаванд.
Соли гузашта аз Тоҷикистон ба Ӯзбекистон бо нархи 2 сенти амрикоӣ барои 1 киловатт 1 млрд 425,1 млн кВт/соат неруи барқ интиқол дода шуд. Маблағи умумии содироти барқ аз Тоҷикистон ба ҳамсоякишвар 28,5 млн долларро ташкил дод.
Соли 2019 Тоҷикистон аз Ӯзбекистон ба маблағи 17,7 млн доллар 140 млн метри мукааб гази табиӣ харид.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
