Ҳукумати Тоҷикистон шумори автомашинаҳои сабукрави хидматӣ барои мақомоти давлатиро муайян кард. Автомашинаҳои махсуси сохторҳои қудратӣ, мақомоти ҳифзи ҳуқуқ ва баъзе сохторҳои дигар ба ин номгӯй дохил нестанд.
Мувофиқи қарор аз 26 апрели соли 2022 зери №179, барои мақомоти давлатӣ, мақомоти худидоракунии шаҳраку деҳот ҷудо кардани 2090 адад автомобилҳои сабукрави хидматӣ (ба ҷуз автомашинаҳои махсус) муқаррар шудааст.
Аз ҷумла барои Маҷлиси миллӣ ва Маҷлиси намояндагони Маҷлиси Олӣ, мақомоти марказии иҷроияи ҳокимияти давлатӣ, суд ва мақомоти прокураура 1 ҳазору 118 адад автомашина ҷудо карда мешавад.
Аз ҳама бештар автомашинаҳо – 160 адад дар хидмати Дастгоҳи иҷроияи президент қарор доранд.
Барои Кумитаи андоз 110 адад, Суди олӣ – 95, Вазорати молия – 92 ва Прокуратураи генералӣ 85 адад автомашинаҳои хидматӣ пешбинӣ шудааст.
Вакилони Маҷлиси намояндагон барои иҷрои вазифаҳои худ аз 77 мошини сабукрав, Агентии омор – 73, Кумитаи идораи замин ва геодезия – 72 автомобилҳои хидматӣ истифода мебаранд.
Ба Вазорати энергетика ва захираҳои об 23, Вазорати нақлиёт – 22, Вазорати меҳнат – 21, Вазорати тандурустӣ – 19, Вазоратҳои адлия ва рушди иқтисод – 13-тогӣ, Вазоратҳои корҳои хориҷӣ ва кишоварзӣ – 9-тогӣ автомашинаҳои хидматӣ ҷудо карда мешаванд.
Барои мақомоти ҳокимияти маҳаллӣ 972 автомобил ҷудо карда мешавад, ки аз ин шумор ҳокимияти вилояти Хатлон бо 354, вилояти Суғд – 245, гуруҳи ноҳияҳои тобеи марказ – 218, ВМКБ – 100 ва шаҳри Душанбе – бо 55 автомашинаҳои хидматӣ таъмин карда мешаванд.
Аз ин шумор инчунин ба раҳбарияти ҳар кадоме аз ҷамоатҳои шаҳраку деҳоти ҷумҳурӣ 1-тогӣ автомашина дода мешавад.
Байни автомашинаҳои хидматӣ бо тамғаҳои гаронбаҳои хориҷӣ – Toyota Land Cruiser, Lexux, KIA, Toyota ва ғайра дучор шудан мумкин аст. Арзиши онҳо дар бозор аз 8 то 30 ҳазор долларро ташкил медиҳад. То ҳол байни онҳо баъзан тамғаҳои замони шӯравӣ – ГАЗ-24 «Волга», ВАЗ-2101 «Жигули» ва ғайраро ҳам дидан имкон дорад.
